Arsenal အသင်းဟာ Hill Dickinson ကွင်းမှာ Everton ကို အနိုင်ယူပြီး Manchester City အသင်းကို နှစ်မှတ်အသာနဲ့ ပရီးမီးယားလိဂ်ဇယားအဆင့် ၁ ကို ပြန်လည်သိမ်းပိုက်နိုင်ခဲ့ပါတယ်။West Ham ကို ၃-၀ နဲ့ အနိုင်ရရှိခဲ့တဲ့ Citizens တို့ကြောင့် Arsenal ဟာ ဒုတိယနေရာကို ခေတ္တကျဆင်းခဲ့ရတာပါ။ ဒါကြောင့် ဇယားထိပ်ကို ပြန်တက်ဖို့ နိုင်ပွဲမဖြစ်မနေလိုအပ်နေတဲ့ Gunners တို့ဟာ အငြင်းပွားဖွယ်ရာ အခြေအနေအချို့ရှိခဲ့ပေမယ့်လည်း သူတို့မျှော်လင့်ထားတဲ့ နိုင်ပွဲကိုတော့ ရယူနိုင်ခဲ့ပါတယ်။
တိုက်စစ်မှူး Viktor Gyokeres ဟာ ငါးပွဲဆက် ဂိုးပေါက်ပျောက်ဆုံးနေမှုကို အဆုံးသတ်ပြီး ဂိုးပြန်သွင်းနိုင်ခဲ့ပါတယ်။ ထောင့်ကန်ဘောကနေတစ်ဆင့် Jake O’Brien ရဲ့ ဂိုးဧရိယာအတွင်း လက်ထိဘောကြောင့် ရရှိလာတဲ့ ပင်နယ်တီကို Gyokeres က အမှားအယွင်းမရှိ ကန်သွင်းယူခဲ့တာ ဖြစ်ပါတယ်။ ဒါကြောင့် ဒီပွဲမှာ အဓိကထားပြောချင်တာ ၃ချက်ပဲရှိပါတယ်။ ကြည့်လိုက်ကြရအောင်။
Everton ရဲ့ အစပိုင်း ကောင်းပုံ
တကယ်တော့ ပွဲစစချင်းမှာ Everton ဟာ လူတော်တော်များများ ခန့်မှန်းထားတာထက် ပိုကောင်းတဲ့ “ပထမပိုင်းကစားပုံကောင်း”ကို ဖော်ဆောင်နိုင်ခဲ့ပါတယ်။ နည်းပြ David Moyes အနေနဲ့ အာဖရိကဖလားသွားကစားနေတဲ့ Gana Gueye၊ Iliman Ndiaye တို့အပြင် ဒဏ်ရာရနေတဲ့ Kiernan Dewsbury-Hall၊ Seamus Coleman နဲ့ Jarrad Branthwaite တို့မပါဘဲ လူစာရင်းကို အခက်အခဲကြားက ပြင်ဆင်ခဲ့ရတာပါ။ဒီလိုအဓိကကစားသမားတွေ မပါဝင်နိုင်ပေမယ့်လည်း Tim Iroegbunam၊ Dwight McNeil နဲ့ Charly Alcaraz တို့ ဦးဆောင်တဲ့ Everton ဟာ ပွဲစစချင်း ၁၅ မိနစ်ကနေ ၂၀ မိနစ်လောက်အထိ အတော်လေးကို အားကောင်းတဲ့ ကစားကွက်ကို ပြသနိုင်ခဲ့ပါတယ်။ The Toffees တွေဟာ Arsenal ကို သူတို့ကစားကွက်အလိုကျ ပုံစံမျိုးဖြစ်အောင် ဖိအားပေးနိုင်ခဲ့သလို၊ နေရာလွတ်မရှိဘဲ ဘောလုံးကို အဝေးကန်ထုတ်ရတဲ့အထိ ထောင်ချောက်တွေ ဆင်နိုင်ခဲ့ပါတယ်။
ဒါပေမယ့် Mikel Arteta ရဲ့ ကစားသမားတွေ ပွဲရေစီးကြောင်းကို စတင်မိသွားချိန်မှာတော့ အားလုံးက ပြောင်းလဲသွားပါတယ်။ ဧည့်သည် Arsenal ဟာ ခံစစ်ကနေ တိုက်စစ်ကို စနစ်တကျ တည်ဆောက်လာနိုင်ပြီး Bukayo Saka နဲ့ Jurrien Timber တို့ရဲ့ အချိတ်အဆက်တွေကတစ်ဆင့် Everton ဂိုးဧရိယာအတွင်းကို အန္တရာယ်ပေးလာနိုင်ခဲ့ပါတယ်။ အဲဒီနောက်မှာတော့ Jake O’Brien ရဲ့ လက်ထိဘောကနေတစ်ဆင့် ရရှိတဲ့ ပင်နယ်တီကို Gyokeres က အဆုံးသတ်ပေးခဲ့တာကြောင့် Arsenal တို့ အသာစီးရသွားခဲ့ပါတယ်။
Everton ဟာ ပွဲပြီးခါနီး ၁၅ မိနစ်လောက်မှာ Arsenal ကို ဖိအားပြန်ပေးနိုင်ခဲ့ပေမယ့် ဂိုးရလောက်တဲ့အထိတော့ အခွင့်အရေး မဖန်တီးနိုင်ခဲ့ပါဘူး။ ဘာပဲဖြစ်ဖြစ် Everton ရဲ့ အားထုတ်မှုကိုတော့ ချီးကျူးရမှာပါ၊ သူတို့ရဲ့ ပရိသတ်တွေဟာ ကစားသမားတွေရဲ့ စွမ်းဆောင်ရည်ထက် ဒိုင်လူကြီးရဲ့ ဆုံးဖြတ်ချက်ကိုပဲ ပိုပြီး အလိုမကျဖြစ်ခဲ့ကြမှာပါ။
Arsenal ရဲ့ ပွဲကို ထိန်းချုပ်နိုင်ပုံနဲ့ စီမံခန့်ခွဲနိုင်မှု
၁-၀ နဲ့ ဦးဆောင်ပြီးနောက်မှာတော့ Arsenal ဟာ ပိုပြီး ယုံကြည်မှုရှိရှိ ကစားလာနိုင်ပါတယ်။ ဂိုးသမား David Raya ရဲ့ ဘောလုံးပေးပို့မှုတွေက Everton ရဲ့ ဖိအားပေးမှုကို ကျော်ဖြတ်ဖို့ အဓိကသော့ချက် ဖြစ်ခဲ့သလို၊ ရှေ့တန်းက Gyokeres၊ Saka နဲ့ Trossard တို့အတွက် နေရာလွတ်တွေ ပိုထွက်လာစေခဲ့ပါတယ်။ ဒုတိယပိုင်းမှာတော့ ပွဲအခြေအနေက Arsenal အတွက် ပိုကောင်းလာပါတယ်။ David Moyes အနေနဲ့ ချေပဂိုးရဖို့ တိုက်စစ်ဆင်လာရတာကြောင့် နောက်တန်းမှာ နေရာလွတ်တွေ ပိုထွက်လာခဲ့ပါတယ်။ ဒါကို ရိပ်မိတဲ့ Mikel Arteta ကလည်း ပိုပြီး ထိုးဖောက်တိုက်စစ်ဆင်နိုင်တဲ့ ကစားကွက်ကို ပြောင်းလဲခဲ့ပါတယ်။ Trossard ဆိုရင် ဂိုးရဖို့ အကောင်းဆုံး အခွင့်အရေး ရခဲ့ပေမယ့် တိုင်ထိခဲ့လို့သာ ဒုတိယဂိုး မရခဲ့တာပါ။ သူတို့ဟာ ပွဲပြီးတဲ့အထိ ပွဲရေစီးကြောင်းကို ကောင်းကောင်း ထိန်းချုပ်သွားနိုင်ခဲ့ပါတယ်။
ပွဲရဲ့ အလှည့်အပြောင်းတွေကို အသုံးချနိုင်ခြင်း
ကိန်းဂဏန်းအချက်အလက်တွေအရ ကြည့်မယ်ဆိုရင် Arsenal ဟာ ဒီနိုင်ပွဲနဲ့ ထိုက်တန်တယ်လို့ ဆိုရမှာပါ။
အချက်အလက် Everton Arsenal
ဘောလုံးပိုင်ဆိုင်မှု 35% 65%
ဂိုးကန်သွင်းမှု (ဂိုးပေါက်တည့်)။ 5 (1) 13 (2)
အပိုင်ဂိုးသွင်းခွင့် 0 2
xG (မျှော်မှန်းဂိုး) 0.2 1.8
Gunners တွေဟာ ပွဲရဲ့ စိတ်လှုပ်ရှားစရာ အလှည့်အပြောင်းတွေကို ကောင်းကောင်း အသုံးချနိုင်ခဲ့ပါတယ်။ ဒါပေမယ့် William Saliba က Everton ကစားသမား Thierno Barry ကို ဂိုးဧရိယာအတွင်း ဖြိုလှဲခဲ့တာကို ဒိုင်လူကြီးက ပင်နယ်တီ မပေးခဲ့တာကြောင့် Arsenal အနေနဲ့ ကံကောင်းခဲ့တယ်လို့လည်း ဆိုရပါမယ်။ တကယ်လို့သာ အဲဒီ ဆုံးဖြတ်ချက်က Everton ဘက် ပါသွားခဲ့ရင် ပွဲရလဒ်ဟာ ၁-၁ ဖြစ်သွားနိုင်ပါတယ်။ ဘာပဲဖြစ်ဖြစ် အရေးကြီးတဲ့ အခိုက်အတန့်တွေကို အနိုင်ရလဒ်အဖြစ် ပြောင်းလဲနိုင်ခဲ့တဲ့ Arsenal ကိုတော့ ချီးကျူးရမှာပဲ ဖြစ်ပါတယ်။