လီဗာပူး ဒီရာသီ ဘာတွေဖြစ်

လွန်ခဲ့တဲ့ ၁လ လောက်တုန်က Liverpool ဟာ မျက်တောင်မခတ်ပဲ ကြည့်ရတဲ့အသင်းတစ်သင်းဖြစ်ခဲ့တယ်။ မနှစ်ကရယ် ဒီရာသီ အစပိုင်းရယ်ပေါ့။တစ်ဂိုးရှုံးနေတာ၊ ကစားသမားတစ်ယောက်လျော့နေတာ၊ ဆယ်ရက်အတွင်း ကစား၃ပွဲကစားရတာ ဘယ်လိုအခြေအနေမျိုးမဆို… နိုင်အောင်ကစားတတ်တဲ့ အသင်းပါ။ မာကျောတဲ့စိတ်ဓာတ်၊ မရပ်မနား ကစားနိုင်တဲ့ အားအင်နဲ့… သူတို့ရဲ့ ထူးခြားတဲ့ Rhythm စည်းချက်ဟာ မှတ်မိလွယ်ခဲ့ပါတယ်။

ဒါပေမယ့် ပြီးခဲ့တဲ့ရာသီ နောက်ဆုံးပွဲအပြီးနဲ့ ဒီရာသီစကြားထဲမှာ တစ်ခုခုပြောင်းလဲသွားတယ်။ အရင်က ရှုပ်ထွေးမှုတွေကြားက အောင်ပွဲဆွတ်ခူးနိုင်ခဲ့တဲ့ ဒီအသင်းဟာပဲ… အခုဆို နောက်ဆုံးသုံးပွဲဆက် ရှုံးခဲ့ပြီ။ ယုံကြည်မှုရှိနေဆဲဆိုပေမယ့်… Slottရဲ့ နည်းစနစ်သစ်ဟာ အနည်းငယ်တော့ သံသယ ဝင်လာစေခဲ့ပါပြီ။

လီဗာပူးဘာဖြစ်နေတာလဲဆိုတာကို သုံးသပ်ကြည့်းရင် အမှန်တရားက… Arne Slot ဟာ သူ့ရဲ့အကောင်းဆုံး ၁၁ ဦးကို အခုထိ မသိရှိသေးဘူး။ ဒါဟာ မလွယ်ကူတဲ့ ပြဿနာတစ်ခုပါ။ Isak နဲ့ Wirtz တို့လို ပေါင်းသန်း ၁၅၀တန် နှစ်ယောက်ဆိုတာ ခုထိ အိပ်မက်ဆန်နေတုန်းပါ။ ဒါပေမယ့် ဘောလုံးဟာ စာရင်းဇယားသက်သက်မဟုတ်ပါဘူး။ ဒါဟာ Rhythm စည်းချက်၊ Chemistry နဲ့ အချိန်ကိုက်ညီမှုပါ… Liverpool က အဲဒါကို အခုထိ မရှာဖွေနိုင်သေးပါဘူး။

build -up တည်ဆောက်မှုအပေါ် အရင်ကအရမ်းယုံကြည်ခဲ့တဲ့ Slot ဟာ အခုဆို လက်ရှိအထိ သူ့အသင်းရဲ့ပင်ကိုလက္ခဏာကို မဆုံးဖြတ်ရသေးဘူး။ ပရီးမီးယားလိဂ် ခုနှစ်ပွဲအတွင်းမှာ ကစားကွက်ပုံစံကို သုံးကြိမ်ပြောင်းလိုက်တယ်။ Wirtz ရဲ့ကစားဟန်အတွက် Rhythm စည်းချက်အရမ်းလိုအပ်နေချိန်မှာတောင် သူ့ကိုအနားပေးခဲ့တယ်။ နောက် Mohamed Salah – အမြဲအားကိုးရတဲ့ ဂိုးရှင်ဟာ… လမ်းပြမြေပုံမရှိဘဲ လမ်းပျောက်နေသူတစ်ယောက်လို ဖြစ်နေပြီ။

Liverpool ရဲ့ နည်းဗျူဟာ ပြောင်းလဲတိုးတက်မှုဟာ Trent Alexander-Arnold နဲ့ Andrew Robertson တို့ကို အစားထိုးဖို့ကနေ စခဲ့တာပါ။ Jeremie Frimpong ရောက်လာပြီး၊ လူငယ် Conor Bradley ကို သက်တမ်းတိုးခဲ့တယ်။ ဘယ်ဘက်မှာလည်း Milos Kerkez ဟာ ရောက်လာခဲ့တယ်။ ဒါပေမယ့် သဘောတရားနဲ့ လက်တွေ့ဟာ အမြဲတမ်းထပ်တူကျတာမဟုတ်ဘူး။

Bradley ရော Frimpong ပါ အရန်ခုံပေါ်မှာ အချိန်အတော်ကြာ ထိုင်ခဲ့ရတယ်။ Slot ဟာ ညာနောက်ခံလူအတွက်ကာ Dominik Szoboszlai ကို ထည့်ကစားခဲ့တယ်။ ဒါဟာ ယုံကြည်မှုရှိလို့ဆိုတာထက် ရုတ်တရက် ဖြေရှင်းလိုက်တဲ့ နည်းဗျူဟာလို့ထင်ရတယ်။အကျိုးဆက်တွေကတော့ နေရာတိုင်းမှာ မြင်နေရပြီ။

Alexander-Arnold လို ဖန်တီးကစားနိုင်မှု မရှိတဲ့အခါ Liverpool ဟာ မိနစ်၉၀တိုင်း Progressive Pass ကိုက်၄၀၀ အကွာဝေးဆုံးရှုံးသွားတယ်လို့ Sky Sportက ဖော်ပြလာခဲ့တယ်။ Progressive Passဆိုတာ အတိုချုံးပြောရရင် ပြိုင်ဘက် ဂိုးပေါက်ကို ဦးတည်ပြီးပေးတဲ့ ဘောလုံးပေးချက်ကိုဆိုလိုပါတယ်။ ဒါဟာ ကိန်းဂဏန်းတစ်ခုတည်းမဟုတ်ဘူး – ဖိအားပေးမှု၊ နယ်မြေသိမ်းပိုက်မှု၊ ထိန်းချုပ်မှုရဲ့ များစွာသောခြေလှမ်းတွေ ပျောက်သွားတာပါ။

အခုဆို Konaté က ခံစစ်ကနေ set up စပြီဆို သူ့မှာပေးစရာ ရွေးချယ်စရာတွေ ကန့်သတ်ခံထားရသလိုဖြစ်နေတယ်။ ဘယ်သူကိုပေးရမှန်းသူမသိဘူး။ ကွင်းလယ်တန်းလိုင်းကိုဖြတ်ပြီး ပေးရမယ့်အစား၊ ရည်ရွယ်ချက်မရှိတဲ့ ပေးပို့မှုပုံစံတွေ ခပ်စ်ိပ်စိပ်မြင်လာရတယ်။ အဲလိုလုပ်လိုက်တဲ့အခါ အသင်းရဲ့ပိုင်ဆိုင်မှုဟာ သိသိသာသာကျဆင်းသွားခဲ့တယ်။

Kerkez ကတော့ Vertical Passတွေပေးရတာထက် အတွင်းဘက်ကိုပေးရတာကို ပိုနှစ်သက်တယ်။ အဲဒါကြောင့် Gravenberch က သူ့ကိုကူညီဖို့ ဘယ်ဘက်ကို ယိမ်းဆင်းလာရတယ်၊ အဲဒီလိုနဲ့ အလယ်တန်းဟာ ကာကွယ်မှုကင်းမဲ့သွားတယ်။ ဇုန်အလွတ်တွေများလာတယ်။ ရုတ်တရက် ဘောလုံးမှားချက်တစ်ချက်ဟာ ထိုးစစ်ဆင်ဖို့အသင့်ရှိနေတဲ့ ပြိုင်ဘက်အတွက်အခြေအနေကောင်းတစ်ခုဖြစ်သွားတယ်။ ချဲလ်ဆီးနဲ့ပွဲမှာ အရမ်းသိသာခဲ့ပါတယ်။

Liverpool ရဲ့အကြီးမားဆုံးအားသာချက်က ဟန်ချက်ညီမှုပါ – ကစားသမားတိုင်းက သူ့ရဲ့နေရာ၊ သူ့ရဲ့စည်းချက်၊ သူ့ရဲ့တာဝန်ကို သိခဲ့ကြတယ်။ အခုတော့ စနစ်ဟာ ပုံစံချထားတာထက် စမ်းသပ်မှုတစ်ခုလို ခံစားရတယ်။ Gravenberch ဟာ ဘောလုံးဆွဲပြေးသူဖြစ်ပြီး ချိတ်ဆက်ကစားတဲ့သူမဟုတ်ဘူး။ Wirtz က လှည့်လည်ချ်ိတ်ဆက်ကစားချင်တယ်၊ ဂ်ိုးပေါက်ထဲ ဘောလုံးဆွဲပြေးတဲ့သူမဟုတ်ဘူး။ Salah ကတော့ စနစ်တကျဖွဲ့စည်းထားတဲ့ ရှုပ်ထွေးမှုပေါ်မှာ စွမ်းဆောင်ရည်ပြချင်သူဖြစ်တယ်။ ဒါပေမယ့် သူနားလည်တဲ့ ရှုပ်ထွေးမှုမျိုးဖြစ်ရမယ်။ အခုချိန်မှာတော့ အချိတ်ဆက်မမိပဲ အရာအားလုံးဟာရောထွေးမှုတွေပဲရှိနေတယ်။ ဒါမျိုးကိုလည်း ပြီးခဲ့တဲ့ရာသီကတည်းက မြင်ဖူးပြီးသားပါ။

ပြီးခဲ့တဲ့ရာသီက Alexander-Arnold ဒဏ်ရာရတဲ့အခါ Liverpool ရဲ့ညာခြမ်းအစွယ်ဟာပျောက်ကွယ်သွားခဲ့တယ်။ Salah ဟာ ဘောလုံးကို ဘေးတန်းအစွန်းနားမှာရယူရတဲ့အတွက် သူဘာမှထိထိရောက်ရောက်မလုပ်နိုင်တော့ဘူး။ အသင်းရဲ့ဘောလုံးတည်ဆောက်မှုဟာ Rhythmစည်းချက်ပျက်သွားပြီး ရလဒ်တွေလည်း ယိုင်နဲ့လာခဲ့တယ်။
ဥရောပကပြိုင်ပွဲကနေ ထွက်ခဲ့ရတယ်၊ ကာရာဘရောင်းဖလားဗိုလ်လုပွဲရှုံးခဲ့တယ်၊ ပရီးမီးယားလိဂ်ရပြီးနောက်ပိုင်းတောင် သူတို့ရဲ့အရှိန်ဟာပျောက်ကွယ်သွားခဲ့တယ်။

လူအများကတော့ စိတ်လျော့လိုက်လို ခြေကျသွားတာဆိုပြီး လျစ်လျူရှုခဲ့ကြတယ်၊ ဒါပေမယ့် အဲဒီပုံစံဟာတကယ်ရှိနေခဲ့တယ်။ ဒီရာသီကိုကြည့်လိုက်ရင် ပြဿနာကအတူတူပဲ၊ ပိုဆိုးတယ်။ အခုဆို တောင်ပံနှစ်ဖက်စလုံးမှာဘောလုံးထွက်ပေါက်တွေဆုံးရှုံးသွားတယ်။ အသင်းရဲ့ပေးပို့မှုကွန်ရက်ဟာ ပြီးခဲ့တဲ့နှစ်က Trent မရှိခဲ့တဲ့ကစားပွဲတွေလိုပဲ ကြောက်စရာကောင်းလောက်အောင်ဆင်တူနေတယ်။ Salah ရဲ့ဘောလုံးထိနှုန်းတွေကျဆင်းနေတယ်။ Isak ဆီရောက်တဲ့ဘောလုံးတွေလည်း မမှန်တော့ဘူး။ Wirtz ဟာ ကစားဟန်ကိုညှိနှိုင်းရမယ့်အစား နောက်ကနေpressing လိုက်ဖမ်းနေရတဲ့ ကွင်းလယ်အထိုင်ကစားသမား လုံးလုံးဖြစ်နေခဲ့တယ်။

ဒါဆို အခုဘယ်လိုဆက်သွားကြမလဲ။အဖြေကတော့ ရိုးရှင်းသလိုလိုနဲ့ ရှုပ်ထွေးတယ် – ဟန်ချက်ညီမှုကို အရင်ဆုံးပြင်ဆင်ရမယ်။Slot ဟာ Liverpool ကို ဘယ်လိုမျိုးအသင်းဖြစ်ချင်တာလဲဆိုတာ ဆုံးဖြတ်ရမယ်။ ကွင်းလယ်ကနေတဆင့် ဘောလုံးကိုထိန်းချုပ်တဲ့အသင်းလား၊ ဒါမှမဟုတ် တစ်ချက်ထိ အမြန်ပေးကစားမဲ့ အသင်းလားဆိုတာပါ။ အခုချိန်မှာတော့ နှစ်ခုကြားညှပ်နေတယ်။ Frimpong ကိုယုံပါ။ Bradley ကိုသင်ယူခွင့်ပေးပါ။ Kerkez ကိုကြီးပြင်းခွင့်ပေးပါ၊ ဒါပေမယ့် သူ့ဘက်ခြမ်းကိုကာကွယ်ဖို့ အလယ်တန်းကိုပြန်ပြင်ဆင်ပါ။ ဘာကြောင့်လဲဆိုတော့ Liverpool ဟာ ခံစစ်အကာအကွယ်ကနေ တိုးတက်မှုကိုမပြန်ရှာနိုင်သရွေ့… သူတို့ရဲ့ဘောလုံးတည်ဆောက်မှု သဘာဝစည်းချက်ကို မပြန်ရသရွေ့… သူတို့ဟာ အင်ဂျင်တစ်ဝက်ပဲချိတ်ထားတဲ့ ကားတစ်စီးလို ကစားနေဦးမှာမို့ပါ။

ဒီပြဿနာပြေလည်သွားတာနဲ့ အရာအားလုံးပြောင်းလဲသွားမယ်။ အလယ်တန်းဟာ ဟန်ချက်ပြန်ညီမယ်။ Isak နဲ့ Wirtz တို့ နောက်ဆုံးတော့ ချိတ်ဆက်မိမယ်။ Salah ဟာ သူ့စိတ်ကြိုက်ဇုန်မှာနေခွင့်ရလာမယ်။ ကစားကွက်တစ်ခုလုံးဟာ ပြန်အသက်ဝင်လာမယ်။ Liverpool ဟာ ကျိုးပဲ့သွားတာမဟုတ်ဘူး – မပြီးပြတ်သေးတာပါ။ Slot ရဲ့Visionဟာ ရဲရင့်တယ်၊ ဒါပေမယ့် ရဲရင့်တဲ့အတွေးတိုင်းမှာ ကျိုးပဲ့သွားနိုင်တဲ့အချက်ရှိတယ်။ စိန်ခေါ်မှုကတော့ ဖလားလမ်းကြောင်းကနေ လွဲချော်မသွားခင် သူပြင်ဆင်နိုင်မလားဆိုတာပါပဲ။

ဘာကြောင့်လဲဆိုတော့ အခုချိန်မှာ နည်းဗျူဟာဆိုင်ရာ လမ်းဆုံလမ်းခွတစ်ခုမှာရပ်နေကြတယ် – လမ်းတစ်ခုက ချန်ပီယံတွေရဲ့ ကြီးစိုးမှုဆီပြန်သွားမယ်၊ နောက်တစ်ခုကတော့ ရှုပ်ထွေးမှုနဲ့ ရပ်တန့်နေမှုထဲကိုရောက်သွားမယ်။ Slot ဟာ အရှိန်အဟုန်ကိုပြန်တည်ဆောက်နိုင်ရင်၊ လိုင်းတွေကြားက စည်းချက်ကိုပြန်ဖြည့်နိုင်ရင်၊ ကြယ်ပွင့်ကစားသမားတွေကို ရှင်းလင်းတဲ့ scope ပြန်ပေးနိုင်ရင် – Liverpool ဟာ ပြန်ကောင်းလာမယ်။ ဒါဟာသူတို့အမြဲလုပ်တတ်ကြတာပါပဲ။ ဒါပေမယ့် ဒီအချိန်မရောက်သေးသရွေ့တော့… သူတို့ဟာ ကျွမ်းကျင်မှု၊ စိတ်အား ထက်သန်မှု၊ ယုံကြည်မှုရှိတဲ့အသင်း… ဒါပေမယ့် ဟန်ချက်ညီမှုကိုတော့ မရသေးတဲ့အသင်းပါပဲ။
ခေတ်သစ်ဘောလုံးမှာဆိုရင်… ဟန်ချက်ညီမှုဟာ အရာအားလုံးပါပဲ။