ဒီနေ့ အားလုံးအတွက် ပြောပြချင်တဲ့ ဇာတ်လမ်းက အံ့အားသင့်ဖွယ် ပြိုလဲမှုတွေအကြောင်းပါ။ ၁၂ ပွဲဲကစားပြီးချိန်မှာ ရှုံးပွဲ ၉ ပွဲ ရှိနေပြီ ဆိုတာ ရိုးရိုး “ခြေချော်တာ” လို့ မပြောနိုင်တော့ပါဘူး။ ဒါဟာ နောက်ဆုံးရခဲ့တဲ့ Premier League ချန်ပီယံဆုကို ခုခံကာကွယ်တဲ့ ရာသီမှာ လုပ်ခဲ့တဲ့ အဆိုးရွားဆုံး အစပိုင်းရလဒ်တွေထဲက တစ်ခု ဖြစ်သွားပါပြီ။အရင်ဆုံး ဒီလို ဆိုးဆိုးရွားရွား စတင်ခဲ့တဲ့ နောက်ဆုံး အသင်းကတော့ ၂၀၁၆-၁၇ ရာသီမှာ Leicester City ပါ။ သူတို့ အဲ့နှစ်မှာ အဆင့် ၁၂ နေရာနဲ့ပဲ ပြီးဆုံးခဲ့ပြီး Claudio Ranieri ကို ရာသီအလယ်မှာပဲ ထုတ်ပစ်ခံခဲ့ရပါတယ်။ အလားတူပဲ José Mourinho ဟာလည်း Chelsea မှာ ၂၀၁၅-၁၆ ရာသီအစမှာ ပထမ ၁၂ ပွဲအတွင်း ၇ ပွဲ ရှုံးနိမ့်ခဲ့ပြီး ခရစ္စမတ်မတိုင်ခင် တစ်ပတ်အလိုမှာပဲ အလုပ်ပြုတ်သွားခဲ့ရပါတယ်။ Arne Slot နဲ့ Liverpool အတွက် သတိပေးချက်တွေဟာ အခုဆိုရင် မီးရောင်လို တောက်ပလို့ နေပါပြီ။
ချန်ပီယံ ဖြစ်လာတာကနေ အခုလို ပရမ်းပတာ ဖြစ်သွားတာ ဟာ ခြောက်လအတွင်းမှာပါ။လွန်ခဲ့တဲ့ခြောက်လတုန်းကတော့ Arne Slot ဟာ ဂန္ထဝင် Jürgen Klopp ရဲ့ နေရာကို အံ့အားသင့်ဖွယ် လွယ်ကူစွာ အစားထိုးနိုင်ခဲ့တယ်လို့ ကမ္ဘာတစ်ဝှမ်း ချီးကျူးခံရသူပါ။ သူ့လက်ထက်မှာ Liverpool ဟာ လက်ကျန် ၄ ပွဲ မတိုင်ခင်မှာပဲ ချန်ပီယံ ဖြစ်ခဲ့ပြီး၊ ဒီလို စောစောစီးစီး ဆွတ်ခူးနိုင်ခဲ့တဲ့ အသင်းက သမိုင်းတစ်လျှောက် ၄ သင်းပဲ ရှိပါတယ်။ Slot ဟာ Premier League ကို ပထမဆုံးနှစ်မှာပဲ အနိုင်ရတဲ့ ငါးယောက်မြောက် မန်နေဂျာ ဖြစ်လာသလို၊ အငယ်ဆုံး ချန်ပီယံမန်နေဂျာ တစ်ယောက်အဖြစ်လလည်း မှတ်တမ်းဝင်ခဲ့ပါတယ်။ အရေးအကြီးဆုံးကတော့ ၃၅ နှစ်ကြာမှ ဒုတိယအကြိမ် Anfield ကို ချန်ပီယံဆုနဲ့ ပြန်လည်ဆောင်ကျဉ်းပေးနိုင်ခဲ့တာ ဖြစ်ပါတယ်။
“ကျွန်တော် လုံခြုံနေတယ်လို့ ခံစားရတယ်” လို့ Arne Slot က PSV ကို ရှုံးနိမ့်ပြီးနောက် ပြောဆိုခဲ့ပေမယ့် အခုတော့ အဲ့စကားဟာ ဝေးကွာလှပါပြီ။ ချန်ပီယံ ဆုလွှာတွေ သိမ်းဆည်းပြီးတာနဲ့ တပြိုင်နက် Liverpool ဟာ သမိုင်းတစ်လျှောက် အကြီးဆုံး နွေရာသီ ဈေးကွက်ကို ဖန်တီးခဲ့ပါတယ် – ပေါင် ၄၅၀ သန်း။ Alexander Isak, Florian Wirtz, Hugo Ekitiké, Milos Kerkez, Jeremie Frimpong, Giovanni Leoni နဲ့ Giorgi Mamardashvili တို့ဟာ Anfield ရဲ့ တံခါးဝကနေ ဝင်ရောက်လာခဲ့ပြီး ပရိသတ်တွေရဲ့မျှော်လင့်ချက်ဟာ ကောင်းကင်ပေါ် ရောက်သွားခဲ့ရပါတယ်။ အခု မေးခွန်းက “ဖလဋးဘယ်နှစ်ခု ရမလဲ” ဆိုတာ ဖြစ်သွားခဲ့ပါတယ်။ Treble လုပ်နိုင်မလား။ ဘယ်သူမှ မယှဉ်နိုင်တော့ဘူးလို့ ထင်ခဲ့ကြပါတယ်။
ဒါပေမဲ့ ဘယ်သူမှ မမြင်နိုင်ခဲ့တဲ့ Plot ပြောင်းပြန်ကြီး ရောက်လာခဲ့ပါတယ်။ ဒီ ပေါင် ၄၅၀ သန်း ဈေးဝယ်ပွဲကြီးဟာ မထင်မှတ်ဘဲ Gunပြောင်းပြန်လှည့်ပစ်ခတ်သလို ဖြစ်သွားခဲ့ပါတယ်။ ချန်ပီယံတွေ ပထမ ၁၂ ပွဲမှာ ၆ ပွဲ ရှုံးတဲ့ အဖြစ်ဆိုးကို သမိုင်းမှာ တတိယအကြိမ်ရင်ဆိုင်ခဲ့ရပြီး Liverpool ဟာ အခု အဲ့စာရင်းထဲ ပါဝင်သွားခဲ့ပါတယ်။ ခံစစ်က၁၂ ပွဲမှာ ဂိုး ၂၀ ပေးထားရပြီး ၃၃ နှစ်အတွင်း အဆိုးဆုံး စံချိန်ပါ။ တချိန်တည်းမှာပဲ Arsenal က ဂိုး ၆ ဂိုးပဲ ပေးထားပါတယ်။ Nottingham Forest ကို အိမ်ကွင်းမှာ ၃-၀၊ Manchester City မှာ ၃-၀ ဆက်တိုက် ရှုံးတာ ၁၉၆၅ နောက်ပိုင်း ပထမဆုံးပါ။ PSV ကို အိမ်ကွင်းမှာ ၄-၁ နဲ့ ရှုံးပြီး ဂိုး ၃ ဂိုးနဲ့အထက် ဆက်တိုက် ၃ ပွဲ ရှုံးတာကတော့ ၇၇ နှစ်အတွင်း ပထမဆုံး ဖြစ်ပါတယ်။ ဒီအသင်းက ရာသီအစမှာ ပထမ ၅ ပွဲ အနိုင်ရခဲ့တဲ့ အသင်း ဆိုတာ ယုံဖို့တောင် ခက်နေပါပြီ။
အသစ်ခေါ်ထားတဲ့ ကြယ်ပွင့်တွေဟာ အသင်းထဲ မလိုက်လျောညီထွေးမကစားနိုင်သေးပါဘူး။ Isak နဲ့ Wirtz နှစ်ယောက်စလုံး ပေါင် ၂၄၁ သန်း ကုန်ခဲ့ပေမယ့် လိဂ်မှာ ဂိုးတစ်ဂိုးမှ မသွင်းရသေးပါဘူး။ ယုံကြည်မှု ပြိုလဲနေပြီး ဂိုးကွာခြားချက်က တော်တော်လေးဆိုးရွားနေခဲ့ပါတယ်။ နွေရာသီမှာ ဖလားဘယ်နှစ်ခု ရမလဲ လို့ ရေတွက်နေကြတဲ့ ပရိသတ်တွေဟာ အခု ရှုံးပွဲ ဘယ်နှစ်ပွဲရှိပြီလဲ လို့ပဲ ရေတွက်နေရပါတော့တယ်။
ဒီလို ပြိုလဲမှုကြီးဟာ သမိုင်းမှာ မရှိခဲ့ဘူး မဟုတ်ပါဘူး။ နောက်ဆုံး ၁၅ နှစ်အတွင်း ချန်ပီယံ ၁၅ သင်းထဲက ၉ သင်းဟာ နောက်နှစ်မှာ ရမှတ် ၁၀ မှတ် နဲ့အထက် ကျဆင်းခဲ့ဖူးပါတယ်။ Manchester City ကပဲ ခြွင်းချက်ဖြစ်ပြီး ကျန်တဲ့အချိန်တွေမှာ Pep Guardiola ရှိတဲ့အခါမှပဲ မကျဆင်းခဲ့တာပါ။ Klopp လက်ထက် ၂၀၁၉-၂၀ မှာ ၉၉ မှတ်နဲ့ ချန်ပီယံ ဖြစ်ပြီး နောက်နှစ်မှာ ၃၀ မှတ် ကျဆင်းခဲ့ဖူးပါတယ်။ အဲ့နှစ်မှာ Anfield မှာ အိမ်ကွင်း ၆ ပွဲ ဆက်တိုက် ရှုံးခဲ့တဲ့ သမိုင်းဆိုးတစ်ခု ဖန်တီးခဲ့ပါပြီ။ Leicester ကတော့ ၃၇ မှတ် ကျဆင်းပြီး Ranieri အလုပ်ပြုတ်ခဲ့သလို၊ Chelsea လည်း Mourinho လက်ထက် ၂၀၁၅-၁၆ မှာ ၃၇ မှတ် ကျဆင်းခဲ့ပါတယ်။
Alan Shearer က ချန်ပီယံဘောလုံးအသင်းတစ်သင်း ဒီလောက် ပြိုလဲတာ တစ်ခါမှ မမြင်ဖူးဘူး” လို့ ပြောခဲ့ဖူးပါတယ်။ သမိုင်းစာအုပ်ထဲမှာ ရှင်းရှင်းလင်းလင်း ရေးထားပါတယ် – Alex Ferguson ဒါမှမဟုတ် Pep Guardiola မဟုတ်ရင် ချန်ပီယံဖြစ်ပြီးရင်တောင် နောက်နှစ် ဆက်အုပ်စိုးနိုင်ဖို့ အာမခံချက် လုံးဝမရှိပါဘူး။အခု Liverpool ဟာ သမိုင်းတစ်လျှောက် အကြီးဆုံး နွေဈေးကွက်ကို လုပ်ခဲ့ပေမယ့် အရင်က ချန်ပီယံတွေ ကြုံခဲ့ရသလို အန္တရာယ်ကြီးနဲ့ မျက်နှာချင်းဆိုင် ရင်ဆိုင်နေရပြန်ပါပြီ။
Arne Slot ဟာ ဒီ Frankenstein လို ဖြစ်သွားတဲ့ Liverpool အသင်းကြီးကို ပြန်လည် ရှင်သန်လာအောင် လုပ်နိုင်ပါ့မလား… အချိန်ကပဲ အဖြေပေးတော့မှာ ဖြစ်ပါတယ်။