ပရီးမီးယားလိဂ်အသင်းဖြစ်တဲ့ Brighton & Hove Albion ရဲ့ ပိုင်ရှင် Tony Bloom ဟာ သူ့ကိုယ်ပိုင်အသင်းတွေအပေါ် လောင်းကြေးထပ်ခဲ့တယ်ဆိုတဲ့ စွဲချက်တွေကြောင့် အခုအချိန်မှာ စစ်ဆေးစုံစမ်းမှုတွေ အများကြီးရင်ဆိုင်နေရပါတယ်။
ဒီဘီလျံနာလောင်းကစားသမား Tony Bloom ဟာ အမေရိကန်တရားရုံးတစ်ခုမှာ အမည်ဖုံးထားတဲ့ “John Doe” လို့ခေါ်တဲ့ ပုဂ္ဂိုလ်ဖြစ်ပြီး၊ ဒေါ်လာ ၇၀ သန်း (ပေါင် ၅၂ သန်းခန့်) အနိုင်ရရှိခဲ့သူအဖြစ် စွပ်စွဲခံထားရတာပါ။ ဒီအနိုင်ငွေထဲမှာ Brighton နဲ့ သူ့ပိုင်ဆိုင်တဲ့ ဘယ်လ်ဂျီယံအသင်း Royale Union Saint-Gilloise ပါဝင်တဲ့ ပွဲစဉ်တွေအပေါ် လောင်းကြေးတွေလည်း ပါဝင်ခဲ့တယ်လို့ ဆိုပါတယ်။
Tony Bloom ကိုယ်တိုင်ကတော့ သူ့ကိုယ်ပိုင်အသင်းတွေ၊ သူတို့ပါဝင်တဲ့ ပြိုင်ပွဲတွေအပေါ် ဘယ်တော့မှလောင်းကြေးမထပ်ခဲ့ဘူးလို့ ငြင်းဆိုထားပြီး၊ သူ့နဲ့နီးစပ်သူတစ်ဦးကလည်း ဒီစွပ်စွဲချက်တွေဟာ “လုံးဝမမှန်ကန်ဘူး” လို့ ပြောပါတယ်။ဒါပေမယ့် အွန်လိုင်းလောင်းကစားပလက်ဖောင်း Rollbit ရဲ့ တွဲဖက်တည်ထောင်သူ Razer ကတော့ နိုဝင်ဘာ ၁၄ ရက်နေ့တုန်းက X ပေါ်မှာ တင်ခဲ့တဲ့ ပို့စ်ထဲမှာ Tony Bloom ရဲ့ Starlizard လောင်းကစားအဖွဲ့ကြီးဟာ အမည်ဖုံးပြီး လူပြိုင်လောင်းခိုင်းတဲ့ နည်းနဲ့ Brighton ပွဲတွေအပေါ် လောင်းကြေးထပ်ခဲ့တယ်လို့ တိုက်ရိုက်စွပ်စွဲခဲ့ပါတယ်။ ဒီလိုလုပ်ရင် FA ရဲ့ လောင်းကစားစည်းမျဉ်းကို ချိုးဖောက်ရာ ရောက်ပါတယ်။
ဒါ့အပြင် ယူကေမှာလည်း Tony Bloom ကို အယူခံဝင်တရားစွဲဆိုထားတဲ့ အမှုတစ်ခုရှိနေပြီး၊ သူ့ရဲ့ Starlizard အဖွဲ့ကြီးဟာ ဘောလုံးပွဲတွေကို အဓိကထား လောင်းကြေးထပ်ပြီး၊ လူပြိုင်တွေကို အသုံးချတယ်လို့ စွပ်စွဲထားပါတယ်။ အဲဒီလူပြိုင်တွေထဲမှာ Nigel Farage ရဲ့ အရင်လက်ထောက်ဖြစ်ခဲ့တဲ့ George Cottrell လည်း ပါဝင်တယ်လို့ ဆိုပါတယ်။
၂၀၁၄ ခုနှစ်တုန်းက FA ဘက်က အသင်းပိုင်ရှင်အနည်းစုကိုပဲ ခွင့်ပြုခဲ့တဲ့ အထူးခွင့်ပြုချက် (carve-out) အရ Tony Bloom ဟာ ပရော်ဖက်ရှင်နယ်လောင်းကစားလုပ်ခွင့်ရှိပေမယ့် သူ့ကိုယ်ပိုင်အသင်းတွေနဲ့ သူတို့ပါဝင်တဲ့ ပြိုင်ပွဲတွေကိုတော့ လုံးဝလောင်းခွင့်မပြုပါဘူး။ ဒီစွပ်စွဲချက်တွေ မှန်ကန်ကြောင်း သက်သေပြနိုင်ရင် ဒါဟာ FA စည်းမျဉ်းကို ပြင်းပြင်းထန်ထန် ချိုးဖောက်ရာရောက်ပါတယ်။ အမတ်ဟောင်းတွေဖြစ်တဲ့ Clive Efford၊ Clive Betts နဲ့ အရင်ကွန်ဆာဗေးတစ်ပါတီခေါင်းဆောင် Iain Duncan Smith တို့ကလည်း FA အနေနဲ့ ဒီအမှုကို အမြန်ဆုံး စစ်ဆေးပြီး ရလဒ်ကို ပွင့်လင်းစွာ ထုတ်ပြန်သင့်တယ်လို့ တောင်းဆိုထားပါတယ်။
Tony Bloom ဘက်ကတော့ သူ့ရဲ့ လောင်းကစားလှုပ်ရှားမှုတွေကို နှစ်စဉ် ထိပ်တန်းစာရင်းကိုင်ကုမ္ပဏီတစ်ခုက စစ်ဆေးပြီး၊ သူ့ကိုယ်ပိုင်အသင်းတွေနဲ့ ပတ်သက်တဲ့ လောင်းကြေးတစ်ခုမှ မရှိကြောင်း အမြဲအတည်ပြုထားတယ်လို့ ပြောဆိုထားပါတယ်။ဒီအမှုနှစ်ခုစလုံး ဆက်လက်ဆောင်ရွက်နေဆဲဖြစ်ပြီး၊ ဘောလုံးလောကထဲမှာ လောင်းကစားနဲ့ ပိုင်ရှင်တွေရဲ့ ဆက်နွယ်မှုကို ပြန်လည်စစ်ဆေးဖို့ ဖိအားတွေ ပိုမြင့်တက်လာနေပါတယ်။