ဘာစီလိုနာ… ဂုဏ်သတင်း၊ ဆုတံဆိပ်တွေနဲ့ လှပတဲ့ ဘောလုံးကစားဟန်တို့ကြောင့် ကျော်ကြားခဲ့ရတဲ့ ကလပ်တစ်ခု — အခုတော့ မတူညီတဲ့ အကြောင်းပြချက်နဲ့ သတင်းခေါင်းစဉ်တွေရဲ့ အလယ်မှာ ရပ်တည်နေပါတယ်။ ကြွေးမြီ ပြဿနာတွေပေါ့။
ယနေ့အချိန်ထိ၊ ဘာစီလိုနာဟာ ဘဏ္ဍာရေးပြဿနာတွေကို ရင်ဆိုင်နေရပါတယ်။ ကလပ်ဟာ Robert Lewandowski အပြောင်းရွှေ့အတွက် Bayern Munich ကို ယူရိုငွေ ၂၀ သန်းခန့် ပေးချေဖို့ ကျန်ရှိနေသေးတယ်လို့ သတင်းတွေက ဆိုပါတယ်။ ယခင်ရာသီတွေက ကျန်ရှိနေသေးတဲ့ အခြားကုန်ကျငွေတွေလည်း ရှိပါသေးတယ်။ ဘဏ္ဍာရေး စီမံခန့်ခွဲမှု ညံ့ဖျင်းမှုကြောင့် ဘာစီလိုနာဟာ အလူးလဲ ထိုးနှက်ခံနေရဆဲပါ။
ဒီပြဿနာတွေက ညတွင်းချင်း ပေါ်ပေါက်လာတာမဟုတ်ပါဘူး။ Bartomeu era ခေတ်ကတည်းက မှိုင်းတိုက်နေခဲ့တာပါ။ စဉ်းစားတွေးခေါ်မှုမရှိဘဲ ငွေကုန်ကြေးကျများပြီး အစီအစဉ်မရှိတဲ့ ငွေသုံးစွဲမှုတွေက ကလပ်ကို ကြွေးမြီထုထဲမှာ နစ်မြုပ်သွားစေခဲ့တာပါ။ ဥရောပရဲ့ ထိပ်တန်းကလပ်အဖြစ် သူတို့ရဲ့ပုံရိပ်ကို ပြန်လည်တည်ဆောက်ဖို့ မျှော်လင့်ချက်နဲ့ ဘာစီလိုနာဟာ နာမည်ကြီးကစားသမားတွေကို မလိုအပ်ပဲ ခေါ်ခဲ့တာတွေ အများကြီးပါ။
မနှစ်ကတော့ ခေါင်းစဉ်တပ်ထားတဲ့ “financial levers” ဆိုတဲ့ ပရောဂျက်အောက် မီဒီယာအခွင့်အရေးတွေ၊ ကလပ်ရဲ့ပိုင်ဆိုင်မှုတွေနဲ့ ဝင်ငွေရဲ့တစ်စိတ်တစ်ပိုင်းတို့ကို ရောင်းချခဲ့ကြတယ်။ ဒါဟာ ဒီနေ့ရှင်သန်ဖို့ မနက်ဖြန်ကို ရောင်းစားနေသလိုမျိုးပါပဲ။ ဒီနည်းဗျူဟာက သူတို့ကို ခဏတာသက်သာခွင့်ရစေခဲ့ပေမယ့် ကြွေးမြီကတော့ မပျောက်ကွယ်သွားပါဘူး — အနာဂတ်ထဲကို ပိုရောက်သွားတာပါ။ ငွေက တစ်ရစ်ပြီးတစ်ရစ်မြှုပ်နေခဲ့တာပါ။
အခု ဘာစီလိုနာရဲ့ လက်တွေ့အခြေအနေက ခက်ခဲနေပါတယ်။ သူတို့ရဲ့ဝင်ငွေထက် ပိုပြီးဆပ်ရမယ့်အကြွေးတွေ ရှိနေပါတယ်။ ကလပ်ရဲ့တန်ဖိုးဟာ ကျဆင်းလာနေပြီး အပြောင်းရွှေ့တိုင်းဟာ ဘဏ္ဍာရေးဆိုင်ရာ ခက်ခဲမှုတွေကြားက လမ်းကြောင်းအမျိုးမျိုးစမ်းပြီး လျှောက်လှမ်းနေရတဲ့ပုံစံပါ။ ဘာစီလိုနာဟာ တစ်ချိန်က Real Madrid နဲ့ တန်းတူ
ဓန အင်အား၊ ကလပ်အဆင့်အတန်းကို လုံးဝပြန်မရောက်နိုင်တော့ဘူးလို့ ခွဲခြမ်းစိတ်ဖြာသူအချို့က ဆိုထားပါတယ် — ကြီးမားတဲ့ ဖွဲ့စည်းပုံဆိုင်ရာ ပြန်လည်တည်ဆောက်မှုမရှိဘဲနဲ့ပေါ့။
ဒါပေမယ့် မျှော်လင့်ချက်ကတော့ ရှိနေဆဲပါ။ ကလပ်မှာ ထူးချွန်ပြီး အနာဂတ်ရှိတဲ့ လူငယ်ကစားသမားတွေ၊ Hansi Flick ရဲ့ ဦးဆောင်မှုနဲ့ (La Masia) ကို ပြန်လည်အာရုံစိုက်မှုတို့ ရှိနေဆဲပါ။ အပြောင်မြောက်ဆုံး စီမံခန့်ခွဲနိုင်မယ်ဆိုရင် ဘာစီလိုနာဟာ ဒီအကျပ်အတည်းကို ရေရှည်ပြန်လည်တည်ဆောက်ရေးအဖြစ် ပြောင်းလဲနိုင်ပါတယ် —
ဒါပေမယ့် ယနေ့အချိန်ထိ အမှန်တရားတစ်ခုကတော့ — ဘာစီလိုနာဟာ သူတို့ရဲ့စွမ်းဆောင်နိုင်စွမ်းထက် ပိုပြီးသုံးစွဲခဲ့တဲ့ နှစ်တွေအတွက် ဆပ်ရမယ့်တန်ဖိုးကို ဆက်လက်ပေးနေရဆဲပါပဲ။