ဘောလုံးဟာ စိတ်အားထက်သန်မှု၊ သစ္စာရှိမှုနဲ့ အိပ်မက်တွေရဲ့ ကစားနည်းတစ်ခုလို့ ဆိုကြပါတယ်။ ဒါပေမယ့် တစ်ခါတရံမှာ ဒီစိတ်အားထက်သန်မှုတွေဟာ မှောင်မိုက်တဲ့ နယ်ပယ်ထဲကို ရောက်ရှိသွားတတ်ပါတယ် – ကိုယ်တိုင်ကစားတဲ့ ပွဲဟာ လောင်းကစားမှုရဲ့ အစိတ်အပိုင်းတစ်ခု ဖြစ်သွားတဲ့အခါမှာပေါ့။ ဒီနေ့မှာတော့ ကျွန်တော်တို့ဟာ လောင်းကစားအလေ့အထတွေကြောင့် ကစားသမားဘဝကို ပျက်စီးစေခဲ့တဲ့ ကျော်ကြားတဲ့ ဘောလုံးသမား ငါးဦးအကြောင်းကို ပြန်လည်ကြည့်ရှုသွားမှာဖြစ်ပါတယ်။
ဇာတ်လမ်းက Ivan Toney ဆိုတဲ့ အင်္ဂလန်ရဲ့နံပါတ် ၉ နဲ့ Brentford အသင်းရဲ့ နာမည်ကျော် တိုက်စစ်မူးဟောင်းကနေ စတင်ချင်ပါတယ်။ သူ့ရဲ့အောင်မြင်မှုဟာ ဇွဲလုံ့လရှိမှုတစ်ခုပါပဲ – အောက်ခြေလိဂ်ကနေ အင်္ဂလန်နိုင်ငံအသင်းထိ ရောက်ရှိခဲ့သူပါ။ ဒါပေမယ့် ၂၀၂၃ ခုနှစ်မှာတော့ အရာအားလုံး ပြောင်းလဲသွားခဲ့ပါတယ်။ အင်္ဂလန် (FA) က Toney ဟာ ဘောလုံးပွဲစဉ်ပေါင်း ၂၃၀ ကျော်ကို တရားမဝင် လောင်းကစားခဲ့တယ်လို့ ထုတ်ဖော်ခဲ့ပါတယ်။ ဒီထဲမှာ ဘရန့်ဖို့
ကလပ်အသင်းတွေ ပါဝင်ခဲ့တဲ့ ပွဲစဉ်တွေလည်း အပါအဝင်ဖြစ်ပါတယ်။ အဲဒီလောင်းကစားမှုတွေထဲက ၁၃ ခုဟာ သူ့အသင်း ရှုံးနိမ့်မယ်ဆိုတဲ့ ရလဒ်ကို လောင်းခဲ့တာပါ။ စုံစမ်းရေးမှူးတွေက သူဟာ ဒီလုပ်ရပ်ကို ဝှက်ထားဖို့ သူငယ်ချင်းတွေရဲ့အကောင့်တွေနဲ့ သီးသန့်ချန်နယ်တွေကို အသုံးပြုခဲ့တယ်ဆိုတာကို တွေ့ရှိခဲ့ကြပါတယ်။ အမှန်တရားပေါ်ထွက်လာတဲ့အခါ ဘောလုံးလောကဟာ တုန်လှုပ်သွားခဲ့ရပါတယ်။ Toney ဟာ ဘောလုံးလောက ကနေ ရှစ်လကြာ ပိတ်ပင်ခံခဲ့ရပြီး ကစားသမားဘဝ အအောင်မြင်ဆုံးနှစ်ရဲ့ ရာသီတစ်ဝက်ကို ဆုံးရှုံးခဲ့ရပါတယ်။ နောက်ပိုင်းမှာတော့ သူဟာ လောင်းကစားစွဲလမ်းမှုနဲ့ ရုန်းကန်ခဲ့ရကြောင်း၊ စိတ်ဓာတ်ကျစရာအချိန်တွေမှာ လောင်းကစားကို ထွက်ပေါက်တစ်ခုအနေနဲ့ အသုံးပြုခဲ့ကြောင်း ဝန်ခံခဲ့ပါတယ်။ သူ့ဇာတ်လမ်းဟာ ကိုယ်နှစ်သက်ရာ အားကစားတစ်ခုဟာ ကိုယ့်ရဲ့ အကျင်းဆိုးစွဲလမ်းမှုတစ်ခု ဖြစ်လာတဲ့အခါ ဆုံးရှုံးဖို့ ဘယ်လောက်လွယ်ကူတယ်ဆိုတာရဲ့ မှန်ချက်တစ်ခုတော့ ဖြစ်ခဲ့ပါတယ်။
နောက်ထပ်တစ်ဦးကတော့ အင်္ဂလန် လက်ရွေးစင် နောက်တန်းကစားသမားတစ်ဦးဖြစ်တဲ့ Kieran Trippier ပါ။ ၂၀၂၀ ခုနှစ်၊ Tottenham ကနေ Atlético Madrid ကို ပြောင်းရွှေ့ချိန်မှာ၊ သူဟာ သူငယ်ချင်းအုပ်စုတစ်ခုထဲမှာ သူ့ပြောင်းရွှေ့မှုအတွက် “ lump on” လုပ်ဖို့ ပြောခဲ့ပါတယ် – ဆိုလိုတာက လောင်းကစားလုပ်ဖို့ပါ။ ဒီစကားလုံးတွေဟာ သာမန်ပြောဆိုမှုတစ်ခုလိုဖြစ်နေပေမယ့်၊ စုံစမ်းစစ်ဆေးမှုတစ်ရပ်ကို စတင်ဖို့အတွက်တော့ လုံလောက်ခဲ့ပါတယ်။ (FA) က သူ့သူငယ်ချင်းတွေဟာ Trippier ပေးခဲ့တဲ့ အတွင်းရေးအချက်အလက်တွေကို အခြေခံပြီး လောင်းကစားခဲ့ကြတယ်လို့ တွေ့ရှိခဲ့ပါတယ်။ Trippier ကို အတွင်းရေးအချက်အလက်တွေကို မျှဝေခဲ့တယ် ဆိုတဲ့ ကန့်သတ်ချက်ကို ချိုးဖောက်ခဲ့တာကြောင့်သာ စွပ်စွဲခံခဲ့ရတာပါ။ သူ့ကို ၁၀ ပတ်ကြာ အကန့်အသတ်ခံခဲ့ရပြီး ပေါင်၇၀,၀၀၀ ဒဏ်လည်း ချမှတ်ခံခဲ့ရပါတယ်။ ဒီဖြစ်ရပ်ဟာ လောင်းကစားနဲ့ ဘောလုံးဟာ ရှုပ်ထွေးစွာ ဆက်စပ်နေတဲ့ ဒီခေတ်ကြီးထဲမှာ ကစားသမားတစ်ဦးရဲ့ ပြောင်းရွှေ့မှုအကြောင်း မဆိုစလောက်ပြောဆိုမှုကြောင့်ဈေးကြီးပေးဆောင်ရနိုင်တယ်ဆိုတာကို သတိပေးချက်တစ်ခုလည်း ဖြစ်ခဲ့ပါတယ်။
တတိယမြောက် နာမည်ကတော့ တစ်ခါက အင်္ဂလန်ရဲ့ တိုက်စစ်မှူးဟောင်း Daniel Sturridge ပါ။ Liverpool အသင်းကနေ ပြောင်းရွှေ့ချိန်မှာ၊ Sturridge ဟာ သူ့မိသားစုဝင်တွေကို သူဘယ်ကိုပြောင်းမယ်ဆိုတဲ့ အစီအစဉ်ကို သီးသန့်ပြောပြပြီးနောက်၊ သူ့မိသားစုဝင်တွေဟာ သူ့ရဲ့နောက်ထပ်ပြောင်းရွှေ့မယ့်နေရာကို လောင်းကစားခဲ့ကြပါတယ်။ FAက ဒါကို ရိုးသားဖြောင့်မတ်မှုကို ချိုးဖောက်ခြင်း၊ အတွင်းရေးအချက်အလက်တွေကို အလွဲသုံးစားလုပ်ခြင်းရဲ့ စည်းမျဉ်းချိုးဖောက်မှုတစ်ရပ်လို့ ခေါ်ဆိုခဲ့ပါတယ်။ Sturridge ဟာ လေးလကြာ အကန့်အသတ်ခံခဲ့ရပြီး ပြင်းထန်တဲ့ဒဏ်ငွေလည်း ချမှတ်ခံခဲ့ရပါတယ်။ ဒီအကန့်အသတ်ခံရမှုဟာ သူ Premier League ကို ပြန်လည်ရောက်ရှိဖို့ အခွင့်အလမ်းကို အဆုံးသတ်သွားစေခဲ့ပါတယ်။ Sturridge အတွက်တော့ သင်ခန်းစာဟာ ကြမ်းတမ်းလွန်းလှပါတယ် ကိုယ်တိုင်မကစားရင်တောင်၊ အခြားသူတစ်ဦးကို အကြံပေးမိတာဟာ ကိုယ့်ရဲ့ယုံကြည်ရမှုကို ဖျက်ဆီးဖို့ လုံလောက်တယ်ဆိုတဲ့ အချက်ပါပဲ။
နောက်ထပ်တစ်ဦးကတော့ အင်္ဂလိပ်ဘောလုံးရဲ့ အငြင်းပွားဖွယ်ရာ ပုဂ္ဂိုလ်တစ်ဦးဖြစ်တဲ့ Joey Barton ပါ။ ကွင်းထဲက လူမိုက်၊ ကွင်းပြင်ပမှာ စိန်ခေါ်သူဖြစ်တဲ့ Barton ဟာ ဆယ်နှစ်ကျော်ကာလအတွင်း ပွဲစဉ်ပေါင်း ၁,၂၀၀ ကျော်ကို လောင်းကစားခဲ့တယ်ဆိုတဲ့ အချက်ပေါ်ထွက်လာပြီးနောက် ၁၈ လကြာ အကန့်အသတ်ခံခဲ့ရပါတယ် – ဒီပွဲစဉ်တွေထဲမှာ သူရဲ့ မိခင်အသင်းတွေပါဝင်ခဲ့တဲ့ ပွဲစဉ်တွေလည်း အပါအဝင်ဖြစ်ပါတယ်။ Barton ဟာ ဘဝထဲက ဖိစီးမှုတွေနဲ့ အခြေအနေဆိုးတွေကို ရင်ဆိုင်ကျော်လွှားဖို့ လောင်းကစားခြင်းကို အသုံးပြုခဲ့ကြောင်း ဝန်ခံခဲ့ပါတယ်။ Barton ရဲ့ဖြစ်ရပ်ဟာ ကစားသမားတွေအတွက် စိတ်ကျန်းမာရေးနဲ့ လောင်းကစားဆိုင်ရာ ပံ့ပိုးကူညီမှုစနစ်တွေကို တင်းကျပ်စေဖို့ ဘောလုံးအာဏာပိုင်တွေကို ဖိအားပေးခဲ့တဲ့ ပထမဆုံးသော ဥပမာတစ်ခုလည်း ဖြစ်ခဲ့ပါတယ်။
နောက်ဆုံးမှာတော့ အီတလီရဲ့ အလားအလာရှိလူငယ်ကစားသမား၊ Newcastle United ရဲ့ ကြယ်ပွင့် Sandro Tonali ဆီကို ရောက်ရှိလာပါတယ်။ ၂၀၂၃ ခုနှစ်မှာ Tonali ဟာ AC Milan အသင်းမှာ ကစားနေဆဲအချိန်တုန်းက AC Milan ပွဲစဉ်တွေကို လောင်းကစားခဲ့တယ်ဆိုတဲ့ သတင်းတွေ ပေါ်ထွက်လာတဲ့ပါ။ပရိသတ်တွေ မယုံနိုင်ခဲ့ကြပါဘူး။ သူဟာ လောင်းကစားလုပ်ရုံသာမက၊ သူ့ရဲ့အကြောင်းအရာတွေကို ဝှက်ထားဖို့ သူ့အသင်းဖော်တွေရဲ့ အကောင့်တွေကို အသုံးပြုခဲ့တယ် လို့လည်း စွပ်စွဲခံခဲ့ရပါတယ်။ စုံစမ်းစစ်ဆေးမှုဟာ ၁၀ လကြာ ပိတ်ပင်ခံရမှုဆီကို ဦးတည်သွားစေခဲ့ပြီး၊ သူ့ရဲ့ပထမဆုံး Premier League ရာသီကို တိုတောင်းသွားစေခဲ့ပါတယ်။Newcastle နဲ့အတူ Champions League မှာ ကစားရမယ့် အိပ်မက်တွေကိုလည်း ပြတ်တောက်သွားစေခဲ့ပါတယ်။ ဒီသတင်းဟာ ချောက်ချားဖွယ်ရာ သတင်းတစ်ရပ်ဖြစ်ခဲ့ပါတယ် – Tonali ကို အီတလီရဲ့ စည်းကမ်းအရှိဆုံး လူငယ်ကစားသမားတွေထဲက တစ်ဦးအဖြစ် မြင်ခဲ့ကြတာကြောင့်ပါ။
ဒီဇာတ်လမ်းတွေဟာ လူဆိုးကြီးတွေအကြောင်း မဟုတ်ကြပါဘူး – သူတို့ဟာ မီးမောင်းထိုးပြထားတဲ့နေရာမှာ အမှားတွေ လုပ်မိခဲ့ကြတဲ့ သာမန်လူသားတွေသာ ဖြစ်ကြပါတယ်။ ဒီဇာတ်လမ်းတစ်ခုစီဟာ တူညီတဲ့ပြဿနာရဲ့ မတူညီတဲ့ဘက်ကို ပြသနေကြတာပါ – ဘောလုံးနဲ့ လောင်းကစားခြင်းဟာ အန္တရာယ်ရှိလောက်အောင် နီးကပ်စွာ ဆက်စပ်နေတဲ့ ကမ္ဘာကြီးတစ်ခုပါ။ Toney ရဲ့ ကိုယ်တိုင်ဝန်ခံခဲ့တဲ့ စွဲလမ်းမှုကနေ Barton ရဲ့ ဆယ်စုနှစ်တစ်ခုစာ အလေ့အထ၊ Sturridge နဲ့ Trippier ရဲ့ အချက်အလက်ယိုစိမ့်မှုတွေကနေ Tonali ရဲ့ မဆင်မခြင်မှုတွေအထိ – ဇာတ်လမ်းတိုင်းမှာ တူညီတဲ့ သင်ခန်းစာတစ်ရပ်ပါဝင်နေပါတယ်။ ဘောလုံးမှာ ရိုးသားဖြောင့်မတ်မှုဟာ အရာအားလုံးပါပဲ။ စိတ်အားထက်သန်မှုနဲ့ အမြတ်အစွန်းကြားက နယ်နိမိတ်ဟာ မှေးမှိန်သွားတဲ့အခိုက်၊ အသက်မွေးမှုတွေဟာ ပြိုလဲသွားကြရပါတော့တယ်။
ဒါကြောင့် ကစားသမားတစ်ဦး ကစားကွင်းပေါ်ကို လှမ်းဝင်လာတာကို နောက်တစ်ကြိမ် မြင်တွေ့ရမယ့်အခါ၊ ကျွန်တော်တို့ သတိရကြရမှာက – အခက်ခဲဆုံးသော တိုက်ပွဲတွေဟာ floodlights တွေအောက်မှာပဲ တိုက်ခိုက်ရတာမျိုး မဟုတ်ပါဘူး။ တစ်ချို့တိုက်ပွဲတွေဟာ တိတ်ဆိတ်စွာ၊ အရိပ်အာဝါသတွေထဲမှာ တိုက်ခိုက်ရတာပါ – ဖျားယောင်းသွေးဆောင်မှု၊ ဖိအားတွေနဲ့ ဘယ်တော့မှ အိပ်ပျော်မသွားတဲ့ ကစားနည်းတစ်ခုထဲမှာ လူသားဆန်ဆန် ရှင်သန်ရပ်တည်ရတဲ့ အနှစ်သာရအတွက် တိုက်ခိုက်နေရတာပါ။